پی سی بی نے 13 قومی کرکٹرز کو گلوبل سپر لیگ کے لیے این او سی جاری کر دیے
لاہور: پاکستان کرکٹ بورڈ (پی سی بی) نے قومی کرکٹرز کو مختلف غیر ملکی ٹی20 لیگز میں شرکت کی اجازت دیتے ہوئے متعدد کھلاڑیوں کے لیے نو آبجیکشن سرٹیفکیٹس (این او سیز) جاری کر دیے۔
پی سی بی ذرائع کے مطابق محمد حارث، شاداب خان، محمد نعیم، عبداللہ شفیق اور فرحان یوسف سمیت مجموعی طور پر 13 قومی کرکٹرز کو گلوبل سپر لیگ 2026 میں شرکت کے لیے این او سی جاری کیے گئے ہیں۔
اس کے علاوہ شمائل حسین، مہران ممتاز، عثمان خان، علی شبیر، محمد فاروق، محمد عمران، محمد باسط اور خلیل احمد بھی ان کھلاڑیوں میں شامل ہیں جنہیں گلوبل سپر لیگ کھیلنے کی اجازت دی گئی ہے۔
دوسری جانب پی سی بی نے معاذ صداقت کو کیریبین پریمیئر لیگ (CPL) میں شرکت کے لیے بھی این او سی جاری کر دیا ہے، جس کے بعد وہ لیگ میں اپنی متعلقہ فرنچائز کی نمائندگی کر سکیں گے۔
پاکستان کرکٹ بورڈ کی جانب سے این او سیز کے اجرا کا مقصد قومی کرکٹرز کو بین الاقوامی ٹی20 لیگز میں شرکت کا موقع فراہم کرنا ہے تاکہ وہ عالمی سطح پر اپنی صلاحیتوں کا مظاہرہ کرنے کے ساتھ ساتھ مزید تجربہ بھی حاصل کر سکیں۔
