کارگل جنگ کے عظیم ہیرو، نشانِ حیدر پانے والے کیپٹن کرنل شیر خان شہید کی 27ویں برسی آج عقیدت و احترام کے ساتھ منائی جا رہی ہے۔ قوم نے مادرِ وطن کے اس بہادر سپوت کی لازوال قربانی کو خراجِ تحسین پیش کیا۔
ڈیلی اردو میڈیا کے مطابق کیپٹن کرنل شیر خان شہید نے 5 جولائی 1999 کو کارگل کے محاذ پر دشمن سے بہادری سے لڑتے ہوئے جامِ شہادت نوش کیا۔ ان کی غیرمعمولی جرات اور بے مثال قربانی پر انہیں پاکستان کا اعلیٰ ترین عسکری اعزاز نشانِ حیدر عطا کیا گیا۔
برسی کے موقع پر شہید کے مزار پر پھولوں کی چادر چڑھائی گئی، فاتحہ خوانی کی گئی جبکہ پاک فوج کے چاک و چوبند دستے نے سلامی پیش کرکے قومی ہیرو کو خراجِ عقیدت پیش کیا۔
وزیراعظم Shehbaz Sharif نے بھی کیپٹن کرنل شیر خان شہید کی برسی پر اپنے پیغام میں انہیں زبردست خراجِ عقیدت پیش کیا۔ انہوں نے کہا کہ کرنل شیر خان شہید کی لازوال قربانی پاکستان کی عسکری تاریخ کا ایک درخشاں باب ہے، جو وطن سے وفاداری، جرات اور قربانی کی اعلیٰ روایات کی روشن مثال ہے۔
وزیراعظم کا کہنا تھا کہ کیپٹن کرنل شیر خان شہید کی عظیم قربانی اس حقیقت کی یاد دہانی کراتی ہے کہ پاکستان کی آزادی، خودمختاری اور سلامتی ہمارے شہداء کے مقدس خون کی مرہونِ منت ہے۔ انہوں نے اس عزم کا اعادہ کیا کہ قوم ہر بیرونی اور اندرونی خطرے کے مقابلے میں اپنی مسلح افواج کے شانہ بشانہ کھڑی رہے گی۔
