راولپنڈی: محرم الحرام کے دوران ٹریفک کی روانی برقرار رکھنے اور سیکیورٹی انتظامات کو مؤثر بنانے کے لیے راولپنڈی ٹریفک پولیس نے خصوصی ٹریفک پلان جاری کر دیا ہے۔ اس سلسلے میں 980 سے زائد ٹریفک اہلکار اور افسران مختلف مقامات پر تعینات کیے جائیں گے۔
ترجمان راولپنڈی ٹریفک پولیس کے مطابق محرم الحرام کے دوران مجالس اور جلوسوں کے راستوں کو ٹریفک کے لیے مکمل طور پر بند رکھا جائے گا، جبکہ شہریوں کی سہولت کے لیے ٹریفک کو متبادل راستوں پر ڈائیورٹ کیا جائے گا۔ متبادل راستوں پر اضافی اہلکار بھی تعینات کیے گئے ہیں تاکہ ٹریفک کی روانی برقرار رکھی جا سکے۔
سی ٹی او راولپنڈی Farhan Aslam نے کہا کہ ایمبولینسوں اور دیگر ایمرجنسی گاڑیوں کی آمدورفت کے لیے مخصوص راستے ہر صورت کھلے رکھے جائیں گے۔ انہوں نے واضح کیا کہ جلوسوں اور مجالس کے مقامات پر کسی قسم کی پارکنگ کی اجازت نہیں ہوگی۔
انہوں نے مزید کہا کہ اگر ڈبل سواری پر پابندی نافذ کی گئی تو اس پر مکمل عملدرآمد یقینی بنایا جائے گا، جبکہ سیکیورٹی کے پیش نظر بغیر نمبر پلیٹ گاڑیوں اور کالے شیشوں (بلیک پیپر) کے خلاف بھی سخت کارروائی کی جائے گی۔
سی ٹی او فرحان اسلم نے تمام افسران اور جوانوں کو ہدایت کی کہ وہ امن و امان کی صورتحال کو یقینی بنانے کے لیے ٹیم ورک کے ساتھ اپنی ذمہ داریاں انجام دیں۔ انہوں نے شہریوں سے بھی اپیل کی کہ محرم الحرام کے دوران جلوسوں اور مجالس کے باعث متبادل راستوں کے استعمال کو ترجیح دیں اور ٹریفک پولیس کے ساتھ تعاون کریں۔
انہوں نے کہا کہ محرم الحرام کا پرامن انعقاد ٹریفک پولیس اور شہریوں کے باہمی تعاون سے ہی ممکن ہے۔
