راولپنڈی (نادرکیانی)ضلعی انتظامیہ مری کے زیرِ اہتمام آرٹ کونسل جی پی او چوک میں جشن آزادی تقریب کا انعقاد کیا گیا.. آرٹ کونسل میں پرچم کشائی کی پروقار تقریب میں ایم این اے ضلع مری راجہ اسامہ اشفاق سرور، سیاسی و سماجی شخصیت سردار حسن اورنگزیب، بریگیڈیر احمد نواز اسٹیشن کمانڈر مری، ڈپٹی کمشنر مری آغا ظہیر عباس شیرازی، ڈی پی او آصف آمین اعوان، کامران صغیر اے ڈی سی جی، اسسٹنٹ کمشنر مری، ڈسٹرکٹ ایمرجنسی آفیسر سمیت ریسکیو 1122 مری کے اہلکاروں، ضلعی محکموں کے سربراہان، سول سو سائٹی،ضلعی تنظیموں، علماء کرام اور اساتذہ سمیت بڑی تعداد میں شہریوں نے شرکت کی، تقریب کے دوران بچوں نے ملی نغموں اور تقاریر کی صورت میں وطن سے محبت کا اظہار کیا.
مرکزی تقریب کے موقع پر ایم این اے اسامہ اشفاق سرور نے یوم آزادی کی مبارک باد دی، اس موقع پر اظہار خیال کرتے ہوئے ان کا کہنا تھا کہ یہ وطن ہمارے بزرگوں کی لازوال جہدوجہد اور قربانیوں کے نتیجہ میں معرض وجود میں آیا، قیام پاکستان کے حقیقی مقاصد کے حصول کے لئے لازم ہے کہ ہم بطور قوم اس کی تعمیر و ترقی میں ایمانداری اور جانفشانی سے کردار ادا کرتے رہیں، یہ تجدید عہد کا دن ہے آئیے عہد کریں کہ ہم وطن کی تعمیر و ترقی کے لئے کسی قسم کی قربانی سے دریغ نہیں کریں گے،ضلعی انتظامیہ کے زیر اہتمام یوم آزادی کے موقع پر شجر کاری مہم کا آغاز بھی کیا گیا جس میں شرکاء نے پودے لگائے..
سیکرٹری ایمرجنسی سروسز پنجاب ڈاکٹر رضوان نصیر ستارہ امتیاز کی ہدایت کے مطابق ریسکیو 1122 مری کے زیر اہتمام سنٹرل اسٹیشن سمیت دیگر اسٹیشنز پر بھی پرچم کشائی کی پروقار تقریب منعقد کی گئیں اور “آزادی بہت بڑی نعمت ہے” کے عنوان سے سیمینارز کا انعقاد کیا گیا، سیمینار میں ریسکیو اہلکاروں کی بڑی تعداد نے شرکت کی،تقریب کے اختتام پر ملک و قوم کی سلامتی اور ترقی و خوشحالی کےلئے خصوصی دعائیں کی گئیں
